Madaxweynaha Kenya, William Ruto, oo socdaal ku maraya gobolka Waqooyi-Bari ee dalka, ayaa magaalada Gaarisa ka daah-furay mashaariic dhowr ah, taas oo ay ka mid tahay dib u furista xafiiska bixinta baasaboorka ee deegaanka. Xafiiskan, oo muddo u xirnaa caqabado jira awgood, ayaa hadda lagu wadaa inuu fududeeyo helitaanka baasaboorka ee dadka deegaanka, gaar ahaan Soomaalida Kenya, kuwaasoo horey ugu aadi jiray Nairobi si ay u qaataan baasaboorka.
Intaa waxaa dheer, Ruto ayaa ku dhawaaqay in xukuumaddiisu ay joojin doonto baaritaanka muddo dheer socday ee lagu sameyn jiray dadka doonaya kaarka aqoonsiga muwaadinnimada Kenya. Nidaamkan oo jiray muddo 60 sano ah, ayaa u muuqday mid caqabad ku ah Soomaalida Kenya, waxaana la filayaa in isbeddelkan uu sahli doono helitaanka kaarka aqoonsiga ee muwaadiniinta.
Tallaabooyinkan ayaa muujinaya sida madaxweyne Ruto uu uga go’an yahay inuu dedejiyo habka dadka deegaanka ay ku helaan baasaboorka iyo kaarka aqoonsiga, isla markaana uu hagaajiyo xiriirka iyo is-dhexgalka bulshada Soomaalida Kenya iyo dowladdiisa.